தமிழ்நாடு அரசுப் பணியாளர் தேர்வாணையத்தின் (டி.என்.பி. எஸ்.சி.) 25-ஆவது தலைவராக கே.அருள்மொழி (58) நியமிக்கப்பட்டுள்ளார். அவர் புதன்கிழமை பொறுப்பேற்கக் கூடும் என அரசுத் துறை வட்டாரங்கள் கூறின.
இந்த ஆணையத்தின் பொறுப்புத் தலைவராக சி.பாலசுப்பிரமணியன் செயல்பட்டு வந்தார். இந்த நிலையில், புதிய தலைவராக, பிற்படுத்தப்பட்டோர்-மிகவும் பிற்படுத்தப்பட்டோர்-சிறுபான்மையினர் நலத் துறையின் முதன்மைச் செயலர் கே.அருள்மொழி நியமிக்கப்பட்டுள்ளார்.
இன்று பொறுப்பேற்பு?: ஆளுநர் கே.ரோசய்யாவின் உத்தரவின்படி, 62 வயது அல்லது 6 ஆண்டுகள் அதில் எது முதலில் வருகிறதோ அப்போது அருள்மொழி ஓய்வு பெறுவார். அதன்படி, பொறுப்பேற்ற நாளில் இருந்து 4 ஆண்டுகள் வரை பொறுப்பில் நீட்டிப்பார். புதன்கிழமை அவர் பொறுப்பேற்க வாய்ப்பு இருப்பதாக தலைமைச் செயலக வட்டாரங்கள் தெரிவித்தன.
முனைவர் பட்டதாரி: 1958-ஆம் ஆண்டு மார்ச் மாதத்தில் அருள்மொழி பிறந்தார். தோட்டக்கலைத் துறையில் முனைவர் பட்டம் பெற்றுள்ளார். 1985-இல் தமிழக ஐ.ஏ.எஸ். பிரிவில் இணைந்தார். செங்கல்பட்டில் உதவி ஆட்சியராகப் பணியைத் தொடங்கினார். நகராட்சி நிர்வாகத் துறையில் துணை ஆணையராகவும், வேளாண்மைத் துறையில் இயக்குநராகவும் பணியாற்றினார்.
2001-இல் நிதித் துறையில் சிறப்புச் செயலராகவும், 2002-ஆம் ஆண்டு மார்ச் முதல் ஜூலை வரையில் முதல்வரின் சிறப்புச் செயலராகவும், பின்னர் பணியாளர்-பொது நிர்வாகம்-பயிற்சித் துறையின் செயலராகவும் பணியில் இருந்தார்.
2007-இல் வணிக வரிகள் துறையின் செயலாளராகவும், பண்பாட்டுத் துறை ஆணையராகவும், மாநிலத் திட்ட ஆணையத்தின் உறுப்பினர்- செயலராகவும், பொருளாதாரம்-புள்ளியியல் துறை இயக்குநராகவும் பணியாற்றி வந்தார்.
முதல்வருடன் சந்திப்பு: இந்த நிலையில், முதல்வர் ஜெயலலிதாவை அவரது இல்லத்தில் அருள்மொழி செவ்வாய்க்கிழமை சந்தித்து வாழ்த்துப் பெற்றார்.
25-ஆவது தலைவர்; 11-ஆவது ஐ.ஏ.எஸ். அதிகாரி
தமிழ்நாடு அரசுப் பணியாளர் தேர்வாணையம் கடந்த 1930-இல் உருவாக்கப்பட்டது. இதன் 25-ஆவது தலைவராக அருள்மொழி பொறுப்பேற்க உள்ளார். தலைவர் பதவியை வகிக்கும் 11-ஆவது ஐ.ஏ.எஸ். அதிகாரி இவர்.
சுதந்திரத்துக்கு முன்பு வரை, 5 பேர் தலைவர்களாக இருந்தனர். சுதந்திரம் பெற்ற பிறகு, தேர்வாணையத்தின் முதல் தலைவராக திவான் பகதூர் டி.என்.நாராயணசாமி பிள்ளை பொறுப்பேற்றார்.
ஜே.சிவானந்தம், வி.பாலசுந்தரம், எம்.ஏ.செரீப், ஜே.ஏ.அம்பாசங்கர், டி.லட்சுமிநாராயணன், எஸ்.ஆர்.கருப்பண்ணன், டி.முருகராஜ், யாசின்அகமது, ஏ.எம்.காசிவிஸ்வநாதன், ஆர்.செல்லமுத்து உள்ளிட்டோர் தலைவராகப் பொறுப்பு வகித்துள்ளனர்.