தமிழ்நாடு திறந்தநிலை பல்கலைக் கழகத்தில் 63 புதிய படிப்புகள் அறிமுகப்படுத்தப்படுவதாக துணைவேந்தர் சந்திரகாந்தா ஜெயபாலன் தெரிவித்தார்.சென்னையில் நிருபர்களிடம் அவர் கூறியதாவது:
தொலைதூரக் கல்வி திட்டத்தின் கீழ் படிப்புகள் வழங்கும் பல்கலைக் கழகங்களுக்கு யுஜிசி-யின் தொலைதூரக்கல்வி அமைப் பானது ஆண்டுதோறும் அங்கீ காரத்தை புதுப்பிப்பது வழக்கம். அந்தவகையில், தமிழ்நாடு திறந்தநிலை பல்கலைக்கழகத்தின் அங்கீகாரம் 2015-16-ம் கல்வி ஆண்டுக்கு புதுப்பிக்கப்பட்டு இருக்கிறது.பொதுவாக, திறந்தநிலை பல்கலைக்கழகத்தில் படித்தால் அந்த பட்டம் செல்லாமல் போய்விடுமோ என்ற அச்சம் மாணவர்கள் மத்தியில் பரவலாக நிலவுகிறது. அது தவறு.10-ம் வகுப்பு, பிளஸ் 2 முடித்துவிட்டு பட்டப் படிப்பில் சேர்ந்து படித்தால் அவர்களின் பட்டம் உலகில் எங்கு சென்றாலும் ஏற்றுக்கொள்ளப்படும்.எனவே, திறந்தநிலை பல்கலைக்கழக படிப்புகளைக் கண்டு மாணவர்கள் அச்சப்படத் தேவையில்லை.தமிழ்நாடு திறந்தநிலை பல்கலைக்கழகத்தில் 2 லட்சத்து 20 ஆயிரம் பேர் பல்வேறு படிப்புகளை படித்து வருகின்றனர். இந்த ஆண்டு புதிதாக 63 பட்டப்படிப்புகளை அறிமுகப்படுத்தி உள்ளோம்.
அவற்றில் 5 இளங்கலை, 19 முதுகலை பட்டப்படிப்புகள், 40 சான்றிதழ் மற்றும் பட்டயப் படிப்புகள் ஆகும்.எங்கள் பல்கலைக்கழகத்தின் 8-வது பட்டமளிப்பு விழா அக்டோபர் 10-ம் தேதி சென்னை பல்கலைக்கழக நூற்றாண்டு விழா அரங்கில் நடைபெற உள்ளது. இதில் 15 ஆயிரம் மாணவர்கள் பட்டம் பெறுகின்றனர்.இவ்வாறு துணைவேந்தர் சந்திரகாந்தா ஜெயபாலன் கூறினார். பேட்டியின்போது பதிவாளர் எஸ்.விஜயன் உடனிருந்தார்.